有關MOY的最新媒體報導如下。要翻閱過去的報導，請看「目錄」。

2009年6月22日
東方日報 2009-06-22

要聞港聞
政情：蕭炯柱悔與父頂頸

前規劃環境地政局局長蕭炯柱唔經唔覺已經離開官場八年，佢呢幾年一直做音樂義工培訓青少年，早前仲成立香港青年音樂訓練基金，為各區學校組織樂團。


蕭公子話好多人覺得學音樂要講興趣，但佢就認為興趣係逼出嚟嘅。原來蕭公子細細個就被爸爸安排學小提琴，佢笑言：「小朋友只會有興趣食雪糕，又點會有興趣練琴！」直至佢掌握咗技巧後，才慢慢對小提琴產生興趣。

原來蕭公子曾經係一個叛逆少年，爸爸講東佢就偏要講西，結果搞到兩父子關係變差，甚至有近十年冇乜溝通，蕭公子悔言：「依家我好感激佢，但我已經冇機會同佢講，佢係一個好好嘅爸爸！我失敗時候佢都企喺我背後支持，我瘀過一千次佢都支持我。」所以佢勸天下父母多啲容忍仔女，因為硬碰硬最終只會傷害親子感情。

蕭公子最後同佢爸爸喺足球場上「和解」，因為兩父子都好鍾意睇波，所以佢會不時買飛陪爸爸入場觀賽，尋日係父親節，佢忍唔住好感觸咁話：「佢已經唔喺度，我仲想同佢睇多次球賽。」