有關MOY的最新媒體報導如下。要翻閱過去的報導，請看「目錄」。

2009年7月14日
蘋果日報 2009-07-14

隔牆有耳：蕭炯柱帶伯裘學生外闖

2009年07月14日



小提琴造詣達表演級嘅前規劃環境地政局局長蕭炯柱，退休八年投身音樂教育，因為相信音樂可以磨練、改變青少年。呢個信念，絕對唔係講吓就算，佢一手創立嘅青年音樂訓練基金，剛剛接納咗香港天水圍伯裘書院同賽馬會毅智書院嘅申請，免費為兩間學校嘅學生提供有系統有理想嘅樂器訓練，仲諗住三年後帶佢哋去海外表演。

唔會放棄難搞學生
伯裘唔係名校，最近有學生喺公園索 K而成為新聞。偏偏 Gordon好有信心，透過喺校內組織樂團，建立學生自信心。佢仲語重心長咁話，唔想外間用有色眼鏡看待呢間學校。八方問佢，三年後真係可以帶學生去海外表演？佢話：「百分百有信心！我見得太多啲例子嘞，高雷中學兩年都可以去新加坡音樂交流啦。」
Gordon教細路仔音樂，最大特色係「有入冇出」，一旦收咗你，就永遠唔會放棄你，就算冇天份，點都諗啲嘢畀你做。呢位前高官指揮稍後仲會親自到伯裘落手落腳教音樂，誓言就算遇到難搞嘅學生，一樣會不離不棄，「絕對唔會犧牲任何一個孩子！」。